Budaya Karo : Merga Simantek Kuta

Adi ngerana kita kerna merga simantek kuta tentu maka setiap kuta pasti lit ise lebe simantekisa entah siperlebe ngiani kuta e.

Bagep ka pe ibas belang-belang taneh ulayat Kalak Karo adi sisungkuni gundari piga-piga penduduk sitading ibas kuta e pasti ietehsa ise perlebe simanteki kuta e arah cerita turun temurun, tapi lenga terdokumentasi seh asa gundari.

Adi sinen ibas merga-merga Karo ras cabang-cabangna si enggo terdokumentasiken ibas piga-piga buku bagepe ibas media sidebanna lenga kerina kuta Kalak Karo tersinget dingen itulisken ije sebagai dokumentasi sejarah kuta e silit i belang-belang Taneh Karo Simalem masing-masing kuta merga siapai pemena ndube simantekisa.

Tentu sienda perlu siinventarisir maka kerina kuta ibas Wilayah Karo si memang kin ndube Kalak Karo simantekisa arus idokumentasiken entahpe icatatken dingen perlu pe ipublikasiken ku media sosial gelah enggo menjadi catatan sejarah ibas tiap-tiap kuta Kalak Karo, sebab adi la kin simulai sicatatken gundari nari tentu bas sada paksa pagi kita kehilangen jejak terlebih kubas generasi berikutna. Baci jadi pagi sada kuta Kalak Karo tapi lanai kalak Karo simantekisa ibas cataten silit pepagi erkiteken lalit dokumentasina si lebih awal piah enggo terjadi pembohongan sejarah simanteki kuta e.

Emaka mari si inventarisir kerina kuta Kalak Karo ibelang-belang Taneh Karo Simalem, baik i Kabupaten Karo, Deli Serdang, Langkat, Simalungun, Dairi, Aceh Tenggara rsd.

Bagendam lebe sebagai pengantar gelah baci sipikirken ras sidiskusiken ras-ras terutama ija kutanta masing-masing enggo sieteh merga siapai simantekisa janah asa bancina langsung sicatat terus sipublikasiken ku media sosial, janah adi baci ibas saat pagi irangkum menjadi sada buku khusus kerna Sejarah Kuta Kalak Karo.

Contoh :
Kuta Biak Nampe i Kecamaten Munte, Kab. Karo eme pantekken Sembiring Meliala, e enggo tercatat ibas kuta-kuta pantekken Sembiring Meliala. 

Kuta Mbaru, Kecamaten Munte seh asa gundari lenga terpublikasi/terdokumentasiken merga siapai ndube simantekisa.

Emaka mari ras-ras kita encatat ras empublikasiken ku media sosial merga sipemena simanteki kuta kemulihenta masing-masing terus sikiremken ku media sosial silit gundari.

Bujur ras mejuah-juah kita kerina,

Franta Ginting